પરિમલ

નિરાશા શા માટે થાય છે ? તને જે નિરાશા લાગે છે, તેમાં જ આશાનું અવનવું બીજ રહેલું છે. તને તેની ખબર નથી એટલું જ. નિરાશ શા માટે થાય છે ?

ચિંતાતુર શા માટે બને છે ? તને જે ચિંતાનું કારણ લાગે છે, તેમાં જ તારા જીવનની નિશ્ચિંતતાનું સામ્રાજ્ય સમાયેલું છે. તને તેની ખબર નથી એટલું જ. ચિંતાતુર શા માટે બને છે ?

આંસુ શા માટે સારે છે ? તને જે આંસુનું સ્થાન લાગે છે, તેમાં જ તારા આનંદનું અલૌકિક ઉદભવસ્થાન રહેલું છે. તને તેની ખબર નથી એટલું જ. આંસુ શા માટે સારે છે ?

પરાજયની પીડામાં શા માટે પડે છે ? તને જે પરાજય લાગે છે, તેમાં જ તારા વિજયની નિશાની રહેલી છે. તને તેની ખબર નથી એટલું જ. પરાજયની પીડામાં શા માટે પડે છે ?

(શ્રી યોગેશ્વરજી રચિત 'પરિમલ' માંથી )