પરિમલ

દુ:ખ ને દર્દના દાવાનળથી ડગી ને ડરી જઇશ તો કેમ ચાલશે ?

દુ:ખ ને દર્દ તો આ માર્ગે આવવાનાં જ.

*

પીડા, પરિતાપ, પોકાર ને પ્રતીક્ષાથી હિંમત હારી જઈશ તો કેમ ચાલશે ?

એ સૌની હયાતી તો આ માર્ગમાં રહેવાની જ.

*

અશ્રુ, આહ, આપત્તિ, અપમાન ને ઉજાગરાથી બેચેન બની જઈશ, ને માર્ગ મૂકી દઈશ, તો કેમ ચાલશે ?

એમના વિના તો આ માર્ગમાં આગળ જ નહિ વધાવાનું.

*

નિરાશાથી નાસીપાસ ને ચિંતાથી ચંચળ, ચિંતાતુર કે ચલિતચિત્ત થઈશ તો કેમ ચાલશે ?

નિશ્ચિંતતા અને આશાનું અલૌકિક શાંતિસંપન્ન શિખર આ વિના સર નહિ જ થવાનું.

(શ્રી યોગેશ્વરજી રચિત 'પરિમલ' માંથી )