પરિમલ

જીવનના રૂપમાં ઉપલબ્ધ થયેલા આ અમુલખ, અવર્ણનીય અવસરનો આસ્વાદ લઈ લે, ઓ મારા અમીમય અંતર ! આ અનેરા, અનન્ય અવસરનો આસ્વાદ લઈ લે ! શાંતિ, સુખ ને અલૌકિક આનંદના અનુભવ માટેનો આ અસાધારણ અવસર આવી મળ્યો છે તો એનો અનુભવ કરી લે, આસ્વાદ લઈ લે ને દઈ દે, ઓ મારા અમીમય  અંતર ! આસ્વાદ લઈ લે ને દઈ દે !

શરદ ને વસંત વહી ગઈ, તથા ચોમાસાની હેલી ચાલુ થઈ. શુષ્કસમી સરિતા અભિનવ સલિલે સંપન્ન થઈને, હિલોળે ચઢીને ફરી વહેતી થઈ, તારા પ્રત્યેક પરમાણુને એ રીતે અવનવા શૃંગારે સજી દઈ, રસની રેલમછેલ કરતાં તું પણ વહી લે, ઓ મારા અમીમય અંતર ! મહીની મરુભૂમિને મધુતાથી મઢી દે !

સંગીતના સમારોહમાં શામેલ થયેલા આ સંગીતસમ્રાટની જેમ સંવાદ સાધીને, સંગીતના સ્વર્ગીય સ્વરના અનુસંધાનથી અવનીના અણુપરમાણુને ભરી દે, ઓ મારા અમીમય અંતર ! એ સનાતન સંગીતસમ્રાટની સેવામાં તારું સર્વ કાંઈ ધરી દે !

(શ્રી યોગેશ્વરજી રચિત 'પરિમલ' માંથી )