મારો છોડશો ના હાથ

મારો છોડશો ના હાથ, કદિ ના છોડશો,
મારો તોડશો ના સાથ, કદિ ના તોડશો ....મારો.

રાતના એકાંતમાં, ચંદ્રમાની શાખમાં,
હાથ પકડ્યો હાથમાં, ના છોડશો ....મારો.

સુખ દુ:ખમાં ને વિરહમિલને, પતન ને ઉત્થાનમાં;
પ્રેમની વૃષ્ટિ તમે વરસાવવી ના છોડશો ....મારો.

એકલા જવું જિંદગીમાં પડે કો’દિ પ્રવાસમાં,
હોય સાથી કો’દિ, વધવું કો’દિ તાપે છાંયમાં;
હર્ષ ને રોદન મહીંયે પ્રાણ બેના જોડજો;
રાજમહેલે ઝૂંપડીમાં ખોળલાને ખોલજો ... મારો.

અમીરી ને દીનતા હો, રોગ તમે નિરોગ હો,
સ્વપ્ન જાગૃતિ ને સુષુપ્તિ, દશા કોઈ હોય છો,
ભાવતાં ભોજન મળે કે ક્ષુધા પીડે ખૂબ છો,
કર શરીરે ફેરવો, વરસો સુધાધારા તમો ... મારો.

સર્વ સ્થળ ને કાળમાં મુજને ન એકલ છોડશો,
અમીપાન કરાવજો, સ્વપ્નેય ના તરછોડશો
તમારો જ થઈ ગયો છું વસવસો તો હોય શો ?
કદિ સ્વપ્ને છોડશો તો ભાગ્ય મારું ફોડશો ... મારો.

- શ્રી યોગેશ્વરજી (કાવ્યસંગ્રહ 'આરતી' માંથી)