રે વહાલાં, શું...ગાઉં ?
ઘરમાં હું ગાનાર, તું તો દુનિયામાં ગાનાર;
હું તો છું પીનાર, તું તો સૌને યે પાનાર રે...શું ગાઉં ?
એકલ મારો તાર, તારા અનેક તીણા તાર;
એકજ હાથ મહારો નાનો, તારાનો નહિ પાર રે...શું ગાઉં ?
આંખમાં ઉના છે આંસુડાં, ને હૈયામાં મારા છે હાય;
પ્રેમનાં પૂર આવ્યાં મારે, કેવી રીતે ગવાય ? રે...શું ગાઉં ?
મારામાં તું ગાનાર, રે શું ગાઉં ?
જડ ને ચેતન આખા જગને, પ્રાણતણો પાનાર રે...શું ગાઉં ?
ગાન રહ્યું મારૂં નાનકું, તારૂં તો ગાન વિરાટ;
તો પણ સ્નેહથી સાંભળવા તું,ઊભો રહ્યો જોઈ વાટ રે...શું ગાઉં ?
તેથી જ ગાઉં છું ગીતડું નાનું, ધન્ય માની મારી જાત;
થોડી જ વારમાં રંગભરેલી, વીતી જશે રૂડી રાત રે...શું ગાઉં ?
- શ્રી યોગેશ્વરજી