પાણીમાં મીન પ્યાસી.
જન્મે જલમાં જીવે તેમજ મરે જલે અવિનાશી,
આનંદતણા અર્ણવમાંયે નિશદિન રહે ઉદાસી. ....પાણીમાં०
પાણી એને મન મથુરા ને પુરી દ્વારકા કાશી,
પ્રાણ રમે છે પુણ્યરસે પણ મટે ન પાતકરાશિ; ....પાણીમાં०
પુનમ છતાં ના પ્રકાશ તેમાં, તમ-સેના ના નાસી;
આઝાદીના ઉડે ફુવારા તોય ગળે છે ફાંસી. ....પાણીમાં०
સંપત્તિનો પાર નથી પણ દીનતા રહી હાસી,
અચરજ થાય અનોખું મુજને રંક સ્વર્ગનાં વાસી. ....પાણીમાં०
રડે ટળવળે વ્યથા ભોગવે શાશ્વત સુખનો રાશિ;
લોલ વિલોલ સુલોચન તોયે સૃષ્ટિ ન સાચી ભાસી. ....પાણીમાં०
- શ્રી યોગેશ્વરજી