માંગુ એક હૃદયનું રાજ.
સમર્પણ કરો સઘળું મુજને અન્ય રહે ના કોઈ કાજ. ... માગું.
પ્રત્યેક પળે પાસ વિરાજો, અંતર અંતર કરો અવાજ;
આંખ મળે ને થાય એકતા, વાજે જાણે ઝાંઝપખાજ. ... માગું.
લક્ષ્મી યશની નથી કામના, ચાહું ના સંપત્તિ સાજ;
તમારો કરી દો મુજને તો જીવન પ્રાણ પરમ શિરતાજ. ... માગું.
સ્વર્ગ મોક્ષ ને સર્વ તમે છો ભવસાગરના દિવ્ય જહાજ;
પ્રેમીની પાસે જ રહેજો, જોજો જાય જરી ના લાજ. ... માગું.
(૧-૮-૧૯૫૮, શુક્રવાર)
– © શ્રી યોગેશ્વરજી