MP3 Audio
*
જવાનું ચોક્કસ આ જગથી.
જન્મમરણની મહાનિસરણી, આ તો લઘુ પગથી
જવાનું ચોક્કસ આ જગથી. …
રોવા તેમ કકળવાથી શું ચિંતા કર્યે અમથી,
પોકાર્યે પણ હેતુ સરે ના તપ યજ્ઞે જપથી
જવાનું ચોક્કસ આ જગથી …
રથ બદલાયે, ગતિ બદલાયે એના અશ્વતણી,
પથ બદલાયો લાગે કો'દિ ના બદલાયે રથી.
જવાનું ચોક્કસ આ જગથી ….
સૂકાયે ને ફરી ભરાયે ચાતુર્માસ નદી;
પાનખરે પાન ખરે પાછાં પ્રગટે પ્રાણ ભરી.
જવાનું ચોક્કસ આ જગથી ….
સ્વર્ણસમય આ શ્રેષ્ઠ સાંપડ્યો, સુંદર સાધનથી
શાંતિસહિત જો જઇ શકાયે શોક રહે ન પછી.
જવાનું ચોક્કસ આ જગથી ….
- શ્રી યોગેશ્વરજી