નાહિંમત ના થવું કદીયે, નાહિંમત ના થવું.
સિતારતાર ભલેને તૂટે,
છો સંગીત ન સ્વલ્પ વછૂટે;
શાંત રહી અંતરના તારે ગાવું ગીત નવું. ... કદીયે નાહિંમત.
પ્રવાસ કપરો, સાથ ન કોઈ,
વધવું તોપણ આંસુ લોઈ;
મુશ્કેલી ને ચિંતામાં ના ભારે થાય ભવું. ... કદીયે નાહિંમત.
પ્રવાસ વારંવાર કરાયે,
ધ્રુવપદ તોય ન પાસ જણાયે;
તોપણ શ્રદ્ધાને ખોઈ ના હારી હામ જવું. ... કદીયે નાહિંમત.
શૂળી ઉપર પડે ચાલવું,
અંગારામાં તેમ મ્હાલવું;
ડગવું ના, વધુ વધુ સહવા માટે તૈયાર થવું. ... કદીયે નાહિંમત.
સદાય લે જીવનનો લ્હાવો;
ભલે જલે જીવનની જ્વાળાઓ;
મહાવીર જીવનને માણે કોટીવાર કવું. ... કદીયે નાહિંમત.
(૪-૭-૧૯૫૮, શુક્રવાર)
– © શ્રી યોગેશ્વરજી